🎄 Holiday Season Special
प्रजातान्त्रीक पार्टी नेपालको केन्द्रीय कार्यसम्पादन समितीको बैठक सम्पन्न
२७ मंसिर,काठमाडौँ । प्रजातान्त्रीक पार्टी नेपालको केन्द्रीय कार्यसम्पादन समितीको बैठक हिजो काठमाडौँस्थित कृष्ण भोक पार्टी प्यालेसमा सभ्य र भव्य वातावरणमा सम्पन्न भएको छ । पार्टी अध्यक्ष तारानाथ लुइटेलको अध्यक्षतामा सम्पन्न बैठकले समसामयिक राजनीतिक अवस्था, आगामी निर्वाचनको तयारी तथा पार्टी संगठन सुदृढीकरणका विविध विषयमा गहन छलफल गरेको छ ।
बैठकमा देशको वर्तमान राजनीतिक परिस्थितिले जनतामा सिर्जना गरेको असन्तोष, लोकतान्त्रिक मूल्य–मान्यतामाथि देखिएको चुनौती र त्यसप्रति पार्टीले खेल्नुपर्ने जिम्मेवार भूमिकाबारे विस्तृत समीक्षा गरिएको थियो । अध्यक्ष लुइटेलले बदलिँदो राजनीतिक परिवेशमा प्रजातान्त्रीक पार्टी नेपालले वैकल्पिक र विश्वसनीय राजनीतिक शक्तिका रूपमा आफूलाई प्रस्तुत गर्नुपर्ने आवश्यकता औँल्याउँदै पार्टीको नीति, विचार र कार्यक्रमलाई अझै जनमुखी बनाउँदै लैजाने प्रतिबद्धता व्यक्त गर्नुभयो ।
आगामी निर्वाचनलाई लक्षित गर्दै बैठकमा संगठन विस्तार, स्थानीय तहदेखि केन्द्रसम्म पार्टी संरचना मजबुत बनाउने, कार्यकर्ता परिचालन र मतदातासँग प्रत्यक्ष संवाद बढाउने विषयमा विशेष जोड दिइएको थियो । साथै, भ्रष्टाचार, कुशासन, बेरोजगारी र युवाको बढ्दो विदेश पलायनजस्ता राष्ट्रिय मुद्दामा पार्टीको स्पष्ट धारणा लिएर जनतामाझ जाने रणनीतिबारे पनि छलफल भएको अध्यक्ष लुइटेलले जानकारी दिनुभयो ।
बैठकले राष्ट्रिय हित, लोकतन्त्रको संरक्षण र राजनीतिक स्थायित्वका लागि जिम्मेवार र सशक्त भूमिका निर्वाह गर्ने निर्णयसमेत गरेको छ । पार्टी नेतृत्वले आगामी दिनमा जनआवाजलाई केन्द्रमा राखेर सक्रिय राजनीतिक अभियान अघि बढाउने संकेत दिएको छ । बैठक सौहार्दपूर्ण वातावरणमा सफलतापूर्वक सम्पन्न भएको पार्टीले जनाएको छ ।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
