🎄 Holiday Season Special
राजनीतिक झन्डामा करोडपति बन्ने प्रवृत्तिले नै देश बर्बाद भयो : रास्वपा युवा नेता पुन मगर
२५ मंसिर, काठमाडौँ । राष्ट्रिय स्वतन्त्र पार्टी (रास्वपा) का युवा नेता टेक बहादुर पुन मगरले देशमा फैलिएको राजनैतिक कु–संस्कृति, सत्ता–स्वार्थ र अस्वाभाविक रूपमा फस्टाएको आर्थिक असमानताप्रति कडा आक्रोश व्यक्त गरेका छन्। उनले सामाजिक सञ्जाल फेसबुकमार्फत एक तस्बिरसहित पोष्ट गर्दै पेशा, व्यवसाय र वास्तविक श्रम बिना राजनीतिक दलको झण्डा बोक्ने मात्र आधारमा रातारात करोडपति बन्ने विकृत प्रवृत्तिले नै देशलाई आजको दयनीय अवस्थासम्म ल्याएको आरोप लगाएका छन्।
पुन मगरले लेखेका छन्, “पेशा, व्यावसाय, जागिर बिनै राजनैतिक पार्टीको झन्डा बोकेकै भरमा करोडपति बन्ने परिपाटीको कारण देशको यो अवस्था भएको हो भन्ने कुरा अब सम्पूर्ण न्यायप्रेमी नेपाली नागरिकहरूले बुझिसकेका छन्।”
उनको पोस्टले युवकमा बढ्दो आक्रोश, राजनीतिबाट हराउँदै गएको नैतिकता, र पार्टीगत निष्ठाभन्दा बढी व्यक्तिगत स्वार्थमा केन्द्रित हुँदै गएको सत्ता संरचनालगायत विषयमा व्यापक बहस आरम्भ गरेको छ।
युवानेता पुन मगरले हालको व्यवस्थामा अवसर, स्रोत–साधन र राज्यको पहुँच उनै व्यक्तिहरूले कब्जा गरेको टिप्पणी गरेका छन्, जसले जनताको आवाजभन्दा नेताको चाप्लुसीलाई प्राथमिकता दिन्छन्। उनले यस्ता प्रवृत्तिले इमानदार नागरिक, श्रमशील युवाहरू र सिर्जनशील व्यवसायीहरूको मनोबल कमजोर बनाइरहेको तथा मुलुकलाई दीर्घकालीन अस्थिरतामा धकेलिरहेको चेतावनी दिएका छन्।
रास्वपामा युवा पुस्ता आकर्षित भइरहेका बेला पुन मगरको अभिव्यक्ति पार्टीको भित्री सुधार, स्वच्छ राजनीति र परिणाममुखी नेतृत्वप्रतिको आग्रहका रूपमा पनि हेरिएको छ। उनका अनुसार अब देश तब मात्र सही दिशामा जान सक्छ जब राजनीतिक शक्ति, पद र अवसर अरूको कन्धा टेक्ने होइन, आफ्नो क्षमता, श्रम र योगदानका आधारमा प्राप्त हुन्छ।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
